without diet or exercise weight loss

నో డైటింగ్, నో ఎక్సర్‌సైజ్.. ఈ టిప్స్‌తో బరువు తగ్గండి!

డైటింగ్ చేయకుండా, ఎక్సర్‌సైజ్ జోలికి వెళ్లకుండా బరువు తగ్గాలని అనుకుంటున్నారా..? ఇదిగో ఈ టిప్స్ పాటించండి, మార్పు మీరే గమనిస్తారు.

బరువు తగ్గడం కోసం ఎవరైనా ఏం చేస్తారు..? డైటింగ్ చేస్తారు, మితంగా ఆహారాన్ని తీసుకుంటారు కదూ. అదీ కాదంటే వాకింగ్ చేయడం, జిమ్‌కెళ్లడం.. ఇలా ఎక్సర్‌సైజ్‌లు చేస్తుంటారు. కానీ డైటింగ్ చేయకుండా, కసరత్తుల జోలికి వెళ్లకుండా బరువు తగ్గితే..? భలే ఉంటుంది బాస్, కానీ అదెలా సాధ్యం అంటారా..? ఇప్పుడు మేం చెప్పబోయే కొన్ని టిప్స్ పాటించండి. మీ బరువు కచ్చితంగా అదుపులో ఉంటుంది. ఇంతకూ ఆ టిప్స్ ఏంటంటే.. 

ఆహారాన్ని మెల్లగా నమిలి మింగండి:
ఆహారం తీసుకునేటప్పుడు ఆదరాబాదరగా తినొద్దు. మెల్లగా నమిలి తినండి. ఇలా చేయడం వల్ల ఆహారం తక్కువగా తీసుకుంటాం. త్వరగా పొట్ట నిండిన ఫీలింగ్ కలుగుతుంది.

ప్రొటీన్లు ఎక్కువగా తీసుకోండి: 
ఆహారంలో ప్రొటీన్లు ఎక్కువగా ఉండటం వల్ల త్వరగా పొట్ట నిండుతుంది. ఆకలి తగ్గడం వల్ల శరీరంలోకి తక్కువ కెలరీలు చేరతాయి. ఘెర్లిన్, జీఎల్‌పీ-1 లాంటి హార్మోన్లపై ప్రొటీన్లు ప్రభావం చూపుతాయి. ఇవి ఆకలి పెంచడంలో, కడుపు నిండిన భావన కలిగించడంలో కీలక పాత్ర పోషిస్తాయి. చికెన్ బ్రెస్ట్, చేపలు, గ్రీక్ యోగర్ట్, లెంటిల్స్, క్వినోవా, ఆల్మండ్స్ లాంటి ఆహారంలో ప్రొటీన్లు అధికంగా ఉంటాయి.

పీచు పదార్థాలు ఎక్కువగా ఉండే ఆహారం:
పీచు పదార్థాలు ఎక్కువగా ఉన్న ఆహారం తీసుకోవడం వల్ల చాలా సేపటి వరకు ఆకలి కాదు. విస్కోస్ ఫైబర్ అనే పీచుపదార్థం బరువు తగ్గేందుకు ఉపకరిస్తుంది. విస్కోస్ ఫైబర్ మొక్కల నుంచి లభించే ఆహారంలోనే ఉంటుంది. బీన్స్, ఓట్స్ సెరల్స్, బ్రస్సెల్స్ స్ప్రౌర్ట్స్, ఆస్పరాగస్, నారింజ, అవిసె గింజల్లో ఈ పీచు పదార్థం ఉంటుంది.

తరచుగా నీరు తాగడం: 

మంచి నీటిని తరచుగా తాగడం వల్ల ఆహారం తక్కువగా తీసుకుంటాం. భోజనానికి ముందు నీరు తాగడం వల్ల కొద్దిగా తింటే చాలు పొట్ట నిండుతుంది. భోజనానికి ముందు మంచినీళ్లు తాగని వారితో పోలిస్తే.. తాగేవారు త్వరగా బరువు తగ్గుతారు. 12 వారాలపాటు చేసిన అధ్యయనంలో తినడానికి ముందు నీరు తాగిన వారు 44 శాతం అధికంగా బరువు కోల్పోయినట్టు తేలింది.

కొంచెం.. కొంచెం:
మితంగా ఆహారం తినే వారితో పోలిస్తే ఎక్కువ మొత్తంలో లాగించే వారు త్వరగా బరువు పెరుగుతారు. కొంచెం కొంచెం వడ్డించుకొని తినడం వల్ల శరీరంలోకి తక్కువ కేలరీలు చేరతాయి.

తినేటప్పుడు టీవీ చూడొద్దు: 

తినేటప్పుడు టీవీ చూడటం, కంప్యూటర్ గేమ్స్ ఆడటం లాంటి పనులు చేస్తే.. ఎంత తింటున్నామనే ఆలోచన ఉండదు. ఫలితంగా ఎక్కువ తినేస్తాం. పరధ్యానంగా తినడం వల్ల 25 శాతం ఎక్కువ కేలరీలు తీసుకుంటారు.

కంటి నిండా నిద్ర:
నిద్రలేమి వల్ల లెప్టిన్, ఘెర్లిన్ లాంటి హార్మోన్లపై ప్రభావం పడుతుంది. ఒత్తిడికి లోనైతే కార్టిసాల్ అనే హార్మోన్ ఎక్కువగా విడుదలవుతోంది. హార్మోన్ల అసమతుల్యత వల్ల ఆకలి పెరుగుతుంది, అనారోగ్యకరమైన ఆహారం తీసుకుంటారు. ఫలితంగా శరీరంలోకి ఎక్కువ కేలరీలు చేరతాయి. నిద్రలేమి, ఒత్తిడి వల్ల డయాబెటిస్, ఒబెసిటీ లాంటి అనేక వ్యాధులు చుట్టుముడతాయి.

షుగర్ బేవరేజెస్‌ జోలికి వెళ్లొద్దు:
తీపిగా ఉండే బేవరేజెస్ జోలికి వెళ్లొద్దు. సోడా లాంటి డ్రింక్స్ తాగడం వల్ల రోగాల ముప్పు పెరుగుతుంది. షుగరీ డ్రింక్స్ వల్ల శరీరంలోకి ఎక్కువ కేలరీ చేరతాయి. ఘన పదార్థాల ద్వారా ఒంట్లో చేరిన కేలరీలకు ఇవి అదనం. అందుకే బేవరేజెస్ మానేయడం వల్ల దీర్ఘాకాలికంగా అనేక ఆరోగ్య ప్రయోజనాలు పొందొచ్చు.

Tags:  వెయిట్ లాస్, బరువు తగ్గడం, weight loss, tips in telugu,weight loss,healthy diet,exercise