బుల్లితెర షో 'జబర్దస్త్‌'కి రోజా టాటా!

బుల్లితెర షో ‘జబర్దస్త్‌’కి రోజా టాటా!

వచ్చే వారం ప్రోమోలో కనిపించని రోజా
పార్టీ వ్యవహారాల్లో బిజీ కావడమే కారణం
నాగబాబుతో జడ్జి స్థానాన్ని పంచుకోనున్న శేఖర్ మాస్టర్
బుల్లితెరపై ప్రసారమయ్యే కామెడీ షో ‘జబర్దస్త్’కు రోజా టాటా చెప్పేశారు. గురు, శుక్రవారాల్లో ‘ఈటీవీ’లో ప్రసారమయ్యే ఈ షోకు నటుడు నాగబాబుతో కలిసి రోజా జడ్జిగా వ్యవహరించేవారు. అయితే, నగరి ఎమ్మెల్యేగా పార్టీ వ్యవహారాల్లో తీరిక లేకుండా గడుపుతుండడంతో ఈ నిర్ణయం తీసుకున్నారు.

ఏపీ అసెంబ్లీకి జరిగిన ఎన్నికల్లో నగరి నుంచి పోటీ చేసి విజయం సాధించిన రోజా.. ఆ తర్వాత కామెడీ షోకి గుడ్ బై చెబుతారన్న ప్రచారం జరిగింది. అయితే, అందరి అంచనాలను తలకిందులు చేస్తూ ఆ తర్వాత కూడా ఆమె జడ్జిగా ఎంట్రీ ఇచ్చారు. ఆ తర్వాత ఆమెకు ఏపీఐఐసీ చైర్మన్ పదవి దక్కడంతో బిజీ అయిపోయారు. ఓ వైపు ఎమ్మెల్యేగా ఉంటూనే మరోవైపు జబర్దస్త్ షోలో కనిపిస్తుండడంతో రోజాపై విమర్శలు వచ్చాయి. దీంతో ఆమె ఈ షో నుంచి తప్పుకోవాలని నిర్ణయించినట్టు తెలుస్తోంది.

జబర్దస్త్‌ షో వచ్చే వారానికి సంబంధించి విడుదల చేసిన ప్రోమోలో జడ్జి స్థానంలో రోజా కనిపించకపోవడం ఈ వార్తలకు మరింత ఊతమిస్తోంది. రోజా బదులు ‘ఢీ’ షో జడ్జ్, కొరియోగ్రాఫర్ శేఖర్ మాస్టర్ దర్శనమివ్వడంతో జబర్దస్త్‌కు రోజా గుడ్ బై చెప్పేశారన్న వార్తలు వినిపిస్తున్నాయి. అయితే, ఈ ఒక్క వారానికేనా? లేక షో మొత్తానికా అన్నది మాత్రం తెలియరాలేదు.

Leave a Reply